بخاف من قوة العقل على الجسد،
لاسيما لما يبقى العقل عنده قدرة تخيلية قوية.

ممكن فكرة في ثانية تطلع الشخص لفوق وفكرة تانية في ثانية تنهي الشخص.

دة أنا حتى مقتنع أن ممكن فكرة تتبلور في مخيلة شخص يتمتع بقدرة خيالية قوية، تموته.

حوار:

هو1: أنت عارف… أحنا ممكن نخبي أيه ورا جنانك دة؟
هو2: عارف.. ياما ناس كتير طلبت مني حاجات كتيرة أخبيهالهم ورا جناني..

هو1: وخبيتها؟
هو2: طبعاً يا فندم… حضرتك ممكن تلف وأدخلك ورا عند جناني وخبي إلـ أنت عايزه يا فندم.. بس لو حابب تطلع على حاجة حد مخبيها هناك.. ياريت تقول لي… عشان كل حاجة ليها حاجة.

هو1: تقصد كل حاجة ليها ثمن؟
هو2: يا فندم مفيش حاجة تغلى عليك.

شخصيني الحقيقة رفعت دعوى قضائية ضد جميع شخصياتي المزيفة.. متهمتهم بإنتحال شخصيتها!

بس القضية خسرانة خسرانة.. أصل القاضي والمحامي من شخصياتي الوهمية!

الفترة إل كنت فيها ملتزم جدا؛
كان كل خير بيحصلي بربطه أنه عشان أنا ملتزم.

الفترة إل كنت بعيد جدا عن الدين بس بعمل خير مجتمعي؛
كان كل خير بيحصلي بربطه أنه عشان أنا بعمل خير.

…الخ. مع كل فترة وأختلافها.

لغاية ما أكتشفت أني شخص تعبان في دماغي وبفسر كل حاجة بطريقة تريحني وتحسسني أنه مهما كنت على خطأ.. فأنا لسة بعمل حاجة كويسة.